انواع الاطفال

من طرف **حلم الربيع** الجمعة 03 ديسمبر 2010, 2:58 pm

يختلف الاطفال في سلوكهم وتصرفاتهم ونفسيتهم ..
لذلك .. هناك نماذج مختلفه من الأطفال كنا في يوم من الأيام مثلهم ..

الطفل البريء
في المنزل تجده حبوووب وطبيعي 100 %
لكن مع دخوله المدرسة .. ( تنمحي ) شخصيته ..
فتكثر الاصابات في وجهه .. لأنه مايدافع عن نفسه ..

الطفل العنيد
يطبق نظام البيت بالعناد .. يسوي اللي في راسه ..
مايخاف من الأب أو الأم .. لو قلت له هذا خطر لاتقربه .. عناد فيك يسويه ..
يُــضرب كثيراً في طفولته .. ومع ذلك عنيد مايغير رايه ..

الطفل الحنّـان
يستخدم وسيلة الحنة لتلبية رغباته
له نغمه خاصه في المنزل ..
تلبى رغباته كـُرهاً .. يعانون اهله من الصداع المستمر ..
(هذي اني واني صغيرة)

الطفل المادي
هذا الطفل مايرد السلام الا ( بفلوس ) ..
تعامله مع اهل المنزل .. مادي بحت ..
يستخدمونه لتوصيل طلبات المنزل .. ونقل السوالف.. وكل شي بحسابه ..

الطفل الفتّــان
تجد عند هذا النوع جميع اخبار المنزل ..
يجد المتعه في اذلال غيره بالفتنه عليه .. ماله خاتمه ..
هذا الطفل حتى لو شريت سكوته بفلوس ..
توقع تلقى اخبارك ثاني يوم في الصفحه الرئيسية .. في الجريدة الرسمية ..

الطفل الدلوع
هذا دلوع ماما وبابا .. مكروه من باقي الاطفال لانه مرفه وشايف نفسه عليهم..
تلبى رغباته قبل ان يطلبها ... شخصيته اتكاليه جداً ..

الطفل العله
يزعجك بأسئلته الي ماتنتهي .. يستفسر من كل شي .. حتى لو عطست ..
قالك كيف عطست .. وليش عطست .. وكيف تكونت العطسه ..
يحرجك احياناً .. ويمكن دائماً بأسئلته .. مره تجاوب عليه ومره تسفهه ..
واكثر الاوقات ماتلقى اجابه لاسئلته .. لانك في الحقيقه تجهلها ..

الطفل الهجاج
هذا الطفل مستحيل يقعد في البيت..
يعيش في الشارع اكثر من بيته .. خبره ودليل في كل ممر وطريق ..
يعرف طول الشارع بالسنتيمتر .. من الممكن ان يصبح اذا كبر مهندس طرق ..

الطفل الملسون(اللغوي)
يستانسو اهله على سوالفه .. فصيح جداً ..
ويلقط العبارات والمفردات بسرعة مذهله ..
يسبب احراج دائم لأهله .. من الممكن ان يقول كلمة بالغلط للضيوف او الاقارب ..يتميز احياناً بقلة الذووق والوقاحة اذا انفعل ..
لاينصح بأستفزازه ابداً ..
(هذي بتي)

الطفل اللزقه
تلقاه مسنتر عند باب البيت .. ماحد يطلع الا وهو لازق فيه ..
حتى الضيوف من الممكن تلقاه يلزق فيهم ويطلع وياهم..
يـُـضرب كثيراً .. وخاصه من اخوته اللي اكبر منه .. او خواته ..
لانه عباره عن رادار على طلعاتهم ..احياناً يضطروا يطلعوا من نافذة البيت للهروب منه .. ولكن للأسف يجدونه بانتظارهم في السيارة ..ويسألهم ليش تأخرتوا عليّ ..

الطفل الهادي
هذا الطفل ماله صوت ابد .. وين ماتحطه تلقاه ..
احياناً يهملوه اهله .. لانهم ناسينه ...
واحياناً يلقى اهتمام زائد من اهله .. لو يموت من الجوع ماتكلم ..
في كثير من الاحيان تلقى اهله ناسينه في لسوق او عند الاقارب اثناء الزيارات ..

الطفل القوي
اهله دائماً في احراج و مشاكل مع الناس ..
هرمون الاجرام مرتفع بنسبة عالية في جسمه ..
في كل جبهة طفل في ( منطقتهم ) تلقى له أثر وتوقيع ..
يمثل القائد والفتوه .. يهابونه الاطفال .. يتقرب منه الكبار ويتوددون له حفاظاً على سلامة اطفالهم