(وسط البلد) تجربة شعرية غير تقليدية , بالعامية المصرية

من طرف اميرالقلوب الثلاثاء 24 أغسطس 2010, 1:29 am

بدأت قصتها
بين ثلاثة من فرسان شعر الفصحى وهم الأساتذة الشعراء : سيد يوسف وسامح
محجوب ومحمد منصور حيث كان الإتفاق على كتابة مجموعة مشتركة من الرباعيات
تبدأ كل منها بعبارة وسط البلد وتنتهى بالباء الساكنة, وقد غلبت على النص
الروح النقدية الساخرة من سلبيات المجتمع المصرى ثم تفاعل العديد من
الشعراء مع الفكرة وشاركوا فى كتابتها مما جعلها أكثر ثراء وأتساعاً ونعرض
هنا جانباً من هذه التجربة الفريدة بأقلام الشعراء: سيد يوسف وسامح محجوب
ومحمد منصور بالإضافة إلى حسنين السيد وعمر سامح هلال وأسامة عبد الصبور

وسط البلد جينز وجلاليب
تلقى النقاب جنب المينى جيب
ملناش هوية وطبع عجيب
لا أدوية تنفع ولا طب

وسط البلد فول وفلافل
رغم الكبابكجى ماهوش قافل
والناس هناك طالعة قوافل
تغطس فى بحر الفول وتقب

وسط البلد مخلوع وسطه
محتاج لعالم ك (أرسطو)
يطبخنا فى حلة برستو
ويزيح بقايا ولاد الكمب

وسط البلد مليون باشا
واكلين جاتوه ويا بغاشة
والشعب قرب يتلاشى
ويدوب فى حمض الخوف والرعب

وسط البلد (توك توك ماشى)
يلعن ف دا اللى مايخشاشى
والشمس عينها ماتحماشى
إلا ف قفا الموعود بالغلب

وسط البلد هد المَدنة
وأعمل مع الأوقاف هدنة
يارب خدهم ياتأخدنا
يمكن ميزان العدل يطب

وسط البلد صاحب العزة
كاسه الوطن وأحنا المَزه
جاب للطيور أنف الوزه
وللبهايم داء الكلب

وسط البلد تحرير شبرا
أتوبيسنا عطلان فى الأوبرا
الناس فى أزمتها الكبرى
وأحمد نظيف بيقزقز لب

وسط البلد لو بطل لعب
يبقى البلد دى فى حالة حرب
وساعتها نعلنها طوارىء
وكأننا واقعين ف(دُروب)

وسط البلد هادى وواسع
لو جاى له م الحى التاسع
وموصلك سواق لاسع
يبقى الحقيقة الموقف صعب

وسط البلد كف عروسة
وعنست يادى الحوسة
كتر البدنجان عالكوسة
خلوا العيال تكفر وتسب

وسط البلد (أر يو كريزى)
يابن البلد (تيك إت إيزى)
(الرونج) مش فيك ياعزيزى
(الرونج) كله فى أهل ال(توب)

وسط البلد ياسلام سلم
إياك تحاول تتكلم
كوز المحبة بيتألم
والليل طول صبرنا يارب

وسط البلد سايب جداً
وارثينه أباً عن جداً
لا ديوكنا فالعشة بتدن
ولا الفراخ بتبيض على جنب

وسط البلد دول زرعوها
ودولا عنهم منعوها
ودولا فى السر باعوها
وفلوسها فى حسابهم بتصب

وسط البلد جامعة ماما
تضرب وماتسبش علامة
من برة تلقى الخير ياما
من جوة تدخل بيت الرعب

وسط البلد خمسة فى ستة
مصمصتها ؟! طب سيب حتة
خشبك بترعاه العتة
ولسة بتعافر وتشب؟

تـــــــــــــــابع

من طرف اميرالقلوب الثلاثاء 24 أغسطس 2010, 1:31 am

وسط البلد مجمع علمى
شغلانته إيه ؟ علمك علمى
خلى إنقلاب الروح سلمى
وبلاش فى عيدك تضرب بومب

وسط البلد جمعة الشوان
صلاح جاهين وجمال حمدان
سقيناهم الإحباط ألوان
مين اللى قال الرجل تدب؟

وسط البلد روح أتنيل
لا تعترض ولا تتخيل
إلحق وخلف كام عيل
قبلن مايخدوا (الإنترلوب)

وسط البلد ريحتك فاحت
كل الفرص منك راحت
شكليتة الإصلاح ساحت
والفار بيتنطط فى العب

وسط البلد خلطة كشرى
خس وجزر ومبيد حشرى
وعشان ده شعب النيل عشرى
غمض ودانه وهاتك شرب

وسط البلد أنا من صغرى
عارف طريقك مش دوغرى
حاكم خداع الناس مغرى
والنصب ع الغافلين مش نصب

وسط البلد مليون سوسة
تنخر فى عضم المحروسة
لو كل فرعون له موسى
ماكانتش خربت شرق وغرب

وسط البلد هل مش فاهم؟
إن العواصف بتداهم
واللى بيتق فى الريح واهم
هتلوشه ثم يسير الركب

وسط البلد وسط الأزمة
مفلس ومش لابس جزمة
واقف قصاد شاشة بلازمة
ويقول هاجيبها وأبطل لب

وسط البلد كله أتسمر
دخل الخواجة وأتأمر
ع الأقتصاد اللى أتدمر
واقف بيبكى طلعت حرب

وسط البلد سينما ديانا
صورة الأفيش مش عجبانة
أصل الكتاف العريانة
ملهاش علاقة بمعنى الحب

وسط البلد لو تتمشى
هتلاقى شحات بمقشة
يكنس ولا يحرك قشة
ومنضف الشارع بالكدب

وسط البلد وعلى المشاريب
إلعب بشرط تكون لعيب
بس اللى يدخل جحر الديب
لازم يفوق ويبطل لعب

وسط البلد واقف أغنى
وألعن أبوه اللى أهاننى
طول عمرى عايش مستنى
كفة ميزان العدل تطب